ఫిబ్రవరి 5న అల్లు అర్జున్ చిత్రం విడుదల

అల్లు అర్జున్, త్రివిక్రమ్ శ్రీనివాస్ కలయికలో వచ్చిన జులాయిచిత్రం చక్కటి ప్రేక్షకాదరణ పొందిన విషయం తెలిసిందే. తాజాగా వీరిద్దరి కలయికలో మరో చిత్రం తెరకెక్కుతోంది. హారిక అండ్ హాసిని క్రియేషన్స్ పతాకంపై ఎస్. రాధాకృష్ణ ఈ చిత్రాన్ని నిర్మిస్తున్నారు. సమంత, నిత్యామీనన్, అదాశర్మ కథానాయికలుగా నటిస్తున్నారు. ఫిబ్రవరి 5న చిత్రాన్ని ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు. 

ఈ సందర్భంగా నిర్మాత చిత్ర విశేషాల్ని తెలియజేస్తూ జులాయి తర్వాత అల్లు అర్జున్, త్రివిక్రమ్ శ్రీనివాస్ కాంబినేషన్‌లో తెరకెక్కుతున్న చిత్రమిది. పూర్తిస్థాయి కమర్షియల్ ఎంటర్‌టైనర్‌గా ఈ చిత్రాన్ని రూపొందిస్తున్నాం. అల్లు అర్జున్ నటన, పాత్ర చిత్రణ కొత్త పంథాలో వుంటాయి. ఆయన నుంచి అభిమానులు ఆశించే అన్ని అంశాలు ఇందులో ఉంటాయి. ప్రేక్షకుల అంచనాలకు ఏ మాత్రం తగ్గకుండా త్రివిక్రమ్ ఈ చిత్రాన్ని తీర్చిదిద్దుతున్నారు. ముగ్గురు అందాల భామలతో ఓ యువకుడు సాగించే ప్రేమాయణం ఆసక్తికరంగా ఉంటుంది. చిత్రీకరణ తుదిదశకు చేరుకుంది. ఈ నెలాఖరుతో షూటింగ్‌ను పూర్తిచేసి డిసెంబర్‌లో పాటలను, పోరాటాల్ని తెరకెక్కిస్తాం.

జనవరిలో నిర్మాణానంతర కార్యక్రమాల్ని పూర్తిచేస్తాం. త్వరలో ఆడియోతో పాటు చిత్ర ఫస్ట్‌లుక్‌ను విడుదల చేస్తాం అని తెలిపారు. ఉపేంద్ర, రాజేంద్రప్రసాద్, స్నేహ, బ్రహ్మానందం, సింధుతులాని, వెన్నెల కిషోర్, రావు రమేష్, ఎం.ఎస్.నారాయణ తదితరులు నటిస్తున్న ఈ చిత్రానికి ఆర్ట్: రవీందర్, కెమెరా: ప్రసాద్ మూరెళ్ల, సంగీతం: దేవిశ్రీప్రసాద్, ఎగ్జిక్యూటివ్ ప్రొడ్యూసర్: పి.డి.ప్రసాద్, నిర్మాత: ఎస్. రాధాకృష్ణ, కథ, స్క్రీన్‌ప్లే, దర్శకత్వం: త్రివిక్రమ్ శ్రీనివాస్

Posted in: Tollywood News