బాహుబలి సెన్సార్ పూర్తి జూలై 10న ప్రేక్షకుల ముందుకు

దర్శకుడు ఎస్.ఎస్. రాజమౌళి అద్భుత సృష్టి బాహుబలి. అత్యంత ప్రతిష్టాత్మకంగా, భారీ వ్యయంతో రూపొందుతున్న ఈ చిత్రంలో ప్రభాస్, అనుష్క, తమన్నా, రానా కీలక పాత్రల్ని పోషిస్తున్నారు. అర్కా మీడియా పతాకంపై శోభు యార్లగడ్డ, ప్రసాద్ దేవినేని నిర్మిస్తున్నారు. కె. రాఘవేంద్రరావు సమర్పకుడు. జూలై 10న ఈ చిత్రం ప్రేక్షకుల ముందుకు రానుంది. ఈ సందర్భంగా నిర్మాతలు మాట్లాడుతూ చారిత్రక కథాంశంతో రూపొందుతున్న ఈ చిత్ర సెన్సార్ కార్యక్రమాలు పూర్తయ్యాయి. యు.ఎ. సర్టిఫికేట్ లభించింది. ఇటీవలే విడుదలైన ఆడియోకు శ్రోతల నుంచి అద్భుతమైన స్పందన లభిస్తోంది. తెలుగు, తమిళ, హిందీ, మలయాళ భాషల్లో ఏకకాలంలో ఈ చిత్రాన్ని విడుదల చేయనున్నాం. తమిళ ఆడియోను ఈ నెల 24న, మలయాళ ఆడియోను 27న విడుదల చేయబోతున్నాం. చిత్ర కథ, కథనాలు, ప్రభాస్ నటన, పాత్రచిత్రణ, గ్రాఫిక్స్ హంగులు సినిమాకు ప్రధాన ఆకర్షణగా నిలుస్తాయి అని తెలిపారు. రమ్యకృష్ణ, సుదీప్, సత్యరాజ్, నాజర్, అడివి శేష్, ప్రభాకర్, తదితరులు ముఖ్య పాత్రల్లో నటిస్తున్న ఈ చిత్రానికి సినిమాటోగ్రఫీ: కె.కె. సెంథిల్‌కుమార్, ఆర్ట్: సాబుశిరిల్, సంగీతం: యం.యం.కీరవాణి, ఎడిటింగ్: కోటగిరి వెంకటేశ్వరరావు, నిర్మాతలు: శోభు యార్లగడ్డ, ప్రసాద్ దేవినేని, స్క్రీన్‌ప్లే, దర్శకత్వం: ఎస్.ఎస్.రాజమౌళి.

Posted in: Tollywood News