యువరాణిగా హన్సిక

తమిళంలో హన్సిక జోరు కొనసాగుతోంది. వరుస అవకాశాలతో దూకుడుమీదుంది. ప్రస్తుతం ఆమె చేతిలో ఎనిమిది చిత్రాలున్నాయి. కమర్షియల్ సినిమాలతో పాటు అభినయ ప్రధాన పాత్రలతో అలరిస్తున్న ఆమె తాజాగా మరో బంపర్ ఆఫర్‌ను సొంతం చేసుకుంది. వివరాల్లోకి వెళితే...విజయ్ కథానాయకుడిగా సోషియో ఫాంటసీ నేపథ్యంలో 90 కోట్ల బడ్జెట్‌తో ఓ సినిమా తెరకెక్కనుంది. చింబుదేవన్ దర్శకత్వంలో రూపొందనున్న ఈ చిత్రంలో హన్సిక యువరాణిగా ఓ విలక్షణమైన పాత్రలో కనిపించబోతున్నట్లు తెలిసింది. నవ్యరీతిలో సాగే ఈ చిత్రంలో ఆమె పాత్ర చిత్రణ ఆద్యంతం కొత్తపంథాలో వుంటుందని సమాచారం. అంతేకాకుండా కథానుగుణంగా ఇందులో ఆమెపై కొన్ని పోరాట సన్నివేశాలు ఉంటాయని చిత్ర వర్గాలు చెబుతున్నాయి. హన్సికతో పాటు శృతిహాసన్ మరో కథానాయికగా నటించనున్న ఈ చిత్రానికి దేవిశ్రీప్రసాద్ సంగీతాన్ని సమకూర్చబోతున్నారు. చాలా విరామం తర్వాత సీనియర్ కథానాయిక శ్రీదేవి ఈ సినిమాతో తమిళంలో తన సెకండ్ ఇన్నింగ్స్‌ను ప్రారంభించబోతున్నది. విజయ్ ద్విపాత్రాభినయం చేయనున్న ఈ చిత్రం ఈ నెలలో సెట్స్‌పైకి వెళ్లనుంది.

Posted in: Tollywood News